Si Abigail [Aila Marie] ang naging bunga ng panggagahasa kay Melanie [Melissa Mendez]. Bagama't mahal ni Melanie ang kanyang anak, iniwan pa rin niya ito, sapagkat hindi niya magawang mahalin ang lalaking nanggahasa sa kanya, maliban pa ang kanyang ambisyong yumaman. Lumaki si Abigail na walang kinikilalang ina. Nang mamatay ang kanyang ama, lumuwas siya ng Maynila kasama ang kanyang lola na si [Odette Khan] sa pagbabakasakaling magkaroon ng magandang kapalaran. Naging promodel siya at dito ay nakilala niya si Tom [John Apacible] na tinulungan siyang maging isang "modelo ng masa." Lingid sa kanyang kaalaman, ang kanyang inang si Melanie ay isa nang kinikilalang institusyon sa industriya. Nag-krus ang kanilang landas nang di niya namamalayan. Ang kanilang pagtatagpo bilang mag-ina ay hindi magiging madali sapagkat magiging hadlang sa kanilang kaligayahan ang kanyang kapatid sa ina na si Trisha [Trisha Ferreli], na isang sikat na modelo, na punong-puno ng galit sa kanyang inang si Melanie.
Walang masyadong bago sa pelikula kung kuwento ang pag-uusapan. Ang Silang mga Rampadora ay hindi nakapagbigay ng bagong mensahe ukol sa buhay ng mga modelo sa rampa. Kung tutuusin pa nga ay hindi naman dito umikot ang kuwento, bagkus, ang kuwento ay nakasentro sa relasyon ng mag-inang pinaghiwalay ng kapalaran at panahon. Hindi naman lubos na nakakabagot ang pelikula sa kabuuan dahil naging masinop naman ang pagganap ng mga pangunahing tauhan, maliban na lamang sa mga baguhang tulad ni Trisha Ferrelli na nangangailangan pa rin ng kaunting hasa sa pag-arte. Epektibo ang naging paggamit ng flashback at pasado naman ang daloy ng pelikula.