MAPANUKSO

Ang sabi nila ang pag-ibig ay hindi napipilit at kusa lamang dumadating. Si Carlo (Gerald Lauron), isang mabait at mapagkalingang anak, lingid sa kanyang ina ay nagtatrabaho bilang isang macho dancer sa isang gay bar. Sa trabaho ni Carlo nakilala si Jerome (Emilio Garcia), isang gayproduction manager, na sa una nilang pagkikita ay umibig na ang huli. Tinulungan ni Jerome si Carlo umangat sa buhay sa pamamagitan ng paglapit ni Jerome sa kaibigang direktor upang maisama sa mga proyekto. Nagsama at umusbong ang relasyon ni Jerome at Carlo subalit ang huli ay may tinatagong minamahal, si Donna (Tracy Torres), isa ring mabait at mapagkalingang anak sa kanyang ama na may sakit at nagsasayaw sa klab upang mabuhay. Nabisto ni Donna na may karelasyon na bakla si Carlo. Pinapili ni Donna si Carlo sa kanilang dalawa at pinili niya si Donna. Labis na ikinalungkot ni Jerome ang paghihiwalay nila ni Carlo kayat napag-isipan niyang wakasan ang kanyang buhay at ito'y isinakatuparan niya. Nang malaman ni Lara (Clarissa Mercado), nakababatang kapatid ni Jerome, ang nangyari umuwi kaagad siya galing Amerika upang malaman kung sino ang may kagagawan upang siya ay makaganti. Ang plano ni Lara ay paibigin si Carlo sa kanya nang lubos at kapag alam niyang mahal na mahal na siya ay iiwanan niya ito. Madali bang pigilan ang damdamin lalo na kapag puso na ang umiral?

Maraming pagkukulang sa pelikula at maaaring baguhin sa larangan ng teknikal, istorya at pagganap ng mga bidang artista. Nakapanghihinayang ang husay ni Emilio Garcia sa proyektong ito dahil mababaw lamang ang kanyang karakter na maaari sanang palawakin. Si Clarissa Mercado naman ay may potensyal na maging isang mahusay na aktres kung bibigyan niya ng panahon. Halos lahat ng eksena ay masyadong maliwanag at ang musika na inilathala ay hindi nakakatulong sa eksena. Dahil dito hindi madama ng nanonood ang mga madamdaming eksena ng pelikula. May ilang eksena ay parang kuha ng isang amateur videographer at hindi ng isang cinematographer dahil saliwa ang anggulo ng kuha at mga pinipiling kuha, at hindi pinag-aralan ng komposisyon. Gumamit din ng lumang teknik sa transition ng mga eksena. Sa pangkalahatan, walang naiba ito sa mga ibang pelikula na ang hubad na katawan ng mga artista ang bentahin nito.

KISKISAN

Umiikot ang kwento sa isang prominenteng pamilya sa San Miguel, Bulakan. Si Lola Susanna (Anita Linda) may tatlong apo na sina Jojo (Emilio Garcia), ambisyoso, dominante at may halong pagkamuhi kay Marvin, si Marvin (Gardo Versoza), mabait, mapagkumbaba, at si Olive (Ana Capri) na may lihim na itinatago. Dahil sa pagkatao ni Jojo, lahat ng kanyang maibigan, pera man o babae, ay kanyang nakukuha kahit sa paanong paraan. Wala siyang kabusugan sa mga makamundong bagay, ngunit bigo siya kay Adora (Red Riviera) na kanyang tunay na mahal–-sapagkat si Marvin ang minamahal ni Adora. Ang balak ni Jojo ay agawin kay Marvin si Adora kahit na mag-asawa na sila sa pamamagitan ng panggigipit at panlilinlang. Nagkunyari si Jojo na wala siyang kinalaman sa mga kamalasan ng mag-asawa tulad ng pagkasunog ng kanilang bahay at pagtanggal ni Marvin sa trabaho sa munisipyo. Bagkus pinalabas niya na matulungin siya sa mga ito. Dumating ang panahon na may mabigat na suliranin ang pamilya ni Adora at wala rin siyang matakbuhan kundi si Jojo. Labis na ikinatuwa ni Jojo ang mga pangyayari dahil lalong nababaon sa utang sa kanya ang mag-asawa. Sa mga pagsubok na hinahaharap nila, hanggang kailan kaya tatagal ang pag-ibig nina Adora at Marvin? Pera o pag-ibig ba ang dapat maging sukatan ng isang relasyon?

Kapansin-pansin ang kahusayan ng mga pangunahing gumanap, maliban kina Halina Perez (Gemma) at Red Riviera na nangangailangan ng pagsasanay sa pag-emote ng kanilang linya. Ang sinematograpiya sa pangkalahatan ay mahusay, maliban sa halatang pabor na binibigay ng director sa mahusay na artista na ang kanyang mga eksena ay "artistic" ang gawa. Sa kabilang dako ang salat sa "acting ability" ay "ine-exploit"sa pamamgitan ng paghuhubad. Paminsan-minsan maliwanag ang ilang eksena na dapat ay madilim. Ang musika naman at tunog ay akma sa mga eksena. Naliko ng landas ang kuwento dahil hindi malaman kung paano maipapakita kung paanong mabaon sina Red sa utang na loob kay Emilio na hindi gagamit ng mga gastadong dahilan tulad ng suliranin sa pamilya.