Alyas Bomba Queen

Like ordinary people, Sylvia, Arnel and Vangie have dreams they want to realize. But the harsh realities of life prevented these simple people from achieving their goals. Poverty has pushed them to work in a pub and sell themselves to strangers who long for pleasures of the flesh. They thought life was hopeless until the offer to start in a movie came. Now they will experience how it is to be compensated properly. But all their hopes wither as they face an unexpected end.

Tukaan Movie

Si Jerick (Allen Dizon) ay kabilang sa kilalang angkan ng mga babaerong sabungero: ang kanyang Lolo Gorio (Berting Labra) na mahilig pa ring mangalabit ng babae kahit 80 anyos na, at ang kanyang amang si Mang Ador (Lito Legaspi) na kinamumuhian niya dahil sa idinulot nitong luha at lungkot sa ina niyang si Aling Puring. Dahil "nasa dugo" niya diumano ang pagiging palikero, hindi pa magkasya kay Jerick ang pagkakaroon ng isang mabuting maybahay, si Joanne (Halina Perez), na diumano'y mahal na mahal niya't di ipagpapalit kaninuman. Bagama't may tangkang magpakatino na mula nang mag-asawa, hindi naglaon ay "bumigay" na din siya—hindi nga ipinagpalit ang asawa ngunit nagkaroon naman ng kabit na prosti, at nakabuntis pa ng katulong.

Sa sabong, ang tinutukoy ng katagang Tukaan ay dalawang manok na nagtutukaan sa laban, at kadalasan ito'y nau-uwi sa 'tukaan to death.' Ngunit dahil ito ang pamagat ng pelikula ng mga ilang bold star, ay mahuhulaan na ng manonood na ito'y 'tukaan to ecstacy.' May istorya naman, ayos na din ang direksiyon, at pwede na ang pagganap nina Dizon at Perez, lalo na ang mga beteranong artistang sina Khan at Legaspi. Ngunit nandiyan pa din ang kabagalan ng daloy ng kuwento, at ilang ligaw na eksena na hindi naman kailangan.

Sex Files Movie

Nakamulatan na ni Macmac (Lester Llansang) ang mga kuwento at balitang seks dahil sa pagtitinda niya ng diyaryo kasama ng lola niya. Kaugnay nito ay masusubaybayan niya ang tatlong kuwento na katulad ng nababasa niya sa pahayagan. Sa unang episode ay mag-asawang bakla at tomboy sina Georgina (Barbara Milano) at Mauro (Richard Quan) na nagsisikap bumuo ng pamilya sa likod ng mga tunay nilang pagkatao. Subalit mananaig ang mga damdamin at pagnanasa ng katawan nila sa mga karelasyong katulad nila ang kasarian. Sa ikalawang episode ay sasama ang loob ni Rodelia (Ana Capri) sa kapatid na si Leah (Pyar Mirasol) dahil nalaman niya na kick-out na pala ito sa eskwelahan. Maghihinga siya ng sama ng loob sa boyfriend niyang inmate na si Angel at may mangyayari sa kanila. Tuluyan silang magsasama sa paglaya ni Angel at magiging magkatuwang sa negosyo, pero matutuklasan niyang mayroon na pala itong pamilya at ginagamit lamang siya. Sa ikatlong episode ay isang anak mayaman na nagrerebelde sa muling pag-aasawa ng ama si Nelia (Halina Perez). Sasamantalahin ni Gareth (Paolo Rivero), na inaakala niyang disente, ang katayuan niyang ito at siya ang magpapahamak sa kanya. Malalathala sa dyaryo ang kaso ng panggagahasa kay Nelia sa tulong ng stepmother (Pinky Amador) niyang journalist na magbubuwis ng kanyang buhay dahil sa kaso.

Walang masyadong lumutang sa aspetong teknikal ng pelikula. Biglaan ang pagpapalit ng mga eksena at naapektuhan nito ang daloy ng mga kwento. Maingay ang background at kulang sa balanse at focus ang mga kuha ng kamera. Maayos naman ang pagganap ng mga pangunahing tauhan bagamat hindi gaanong kagalingan. At hindi rin nito naisalba ang kabuuan ng pelikula.

Pantasya Ng Bayan Movie

Pansamantalang iniwan ng rebeldeng si Bernard (Leandro Baldemor) ang asawang si Ligaya (Halina Perez) upang harapin ang isang misyon. Sa kanyang pag-iisa, ang likas na mabait na si Ligaya ay nanatiling tapat sa asawa. Hindi niya pinansin ang tsismis na balang araw ay maghahanap siya ng ibang lalaki. Maraming pagkakataon din na naiwasan niya ang mga lalaking nais magsamantala sa kanya. Nabalitaan niyang napatay si Bernard ng mga pulis sa isang enkuwentro. Upang iwasan ang lungkot na dinaranas at ang masakit na panghuhusga ng mga taga San Bartolome, sumama siya sa dating kasintahang si Mark (John Apacible). Dito nagsimula ang masalimuot na buhay ni Ligaya.

Patuloy pa rin ang ilan sa ating mga prodyuser sa paggamit ng pormulang 4H – halik, hubad, higa, hingal – tulad ng Ligaya… Pantasya ng Bayan. May kuwento sana at aral na mapupulot, pero nagdudumilat pa rin ang katotohanan na ito ay isang sex film. Mabilis ang editing ng buong istorya, pero hindi na-edit ang anim na napakahabang eksena sa pagtatalik. Magaling si Odette Khan sa kanyang papel at ang binatilyong si Rocky Ramirez ay tila may ibubuga sa pag-arte kung hahawakan ng isang batikang direktor.

Kasiping Movie

Kapwa nasa problemadong mga relasyon sina Gilda (Halina Perez) at Romeo Rodel Velayo). Si Gilda, sa kanyang ka-live in na si Boggs (Dante Balboa) na parang walang balak na siya ay pakasalan matapos ang tatlong taon nilang pagsasama. Si Romeo naman ay buong lamig na pinakikisamahan ng asawa nitong si Rowena (Diana Zubiri). Kapwa nakatira ang dalawang pares sa isang condominium building. Nagkrus ang landas nina Boggs at Rowena at may namagitan sa dalawa. Kapwa nila ito itinago sa kani-kanilang asawa ngunit madidiskubre rin sa kalaunan ni Gilda. Nalaman din ni Romeo ang lahat at naging magkatuwang sila ni Gilda sa problema. Ang kanilang pagkakaibigan ay nauwi rin sa pagsisiping. Saan kaya sila dadalhin ng kanilang pagpapalipat-lipat at pagpapalit-palit ng kandungan?

Gasgas na ang tema at istorya ng Kasiping na mababaw na tumalakay sa problemang pakikiapid. Naging nakakabagot ang daloy ng kuwento; kungdi isiningit ang pagpapatawa ng mga batikang komedyanteng sina Giselle Sanchez at Long Mejia ay makakatulog ang manonood sa kabagalan ng napaka-predictable na kuwento. Maraming kakulangan ang pelikula pagdating sa aspetong teknikal. Mula sa malamlam at di-makatotohanang karakterisasyon ng mga pangunahing tauhan (lalo na ng mga bidang sina Diana Zubiri at Halina Perez), hanggang sa sinematograpiya at disenyong pamproduksyon. Pati ang mga diyalogo ay pawang di angkop sa karakter ng mga nagsiganap. Sa kagustuhan ng Kasiping na bigyan ng bagong bihis ang gasgas nitong tema, ang naging resulta ay isang kakatwa ng pelikula na napagiwanan na ng panahon at ebolusyon ng pelikulang Pilipino.

Hinog Sa Pilit Movie

Malaki ang paghanga at inggit ng walong taong si Laila (Monina Perez) sa kanyang Ate Diana (Halina Perez)—ang seksing beauty ng bayan na may nobyo na. Kaya wala siyang pinangarap kungdi maging dalaga na kaagad at nang maari na niyang gawin ang anumang ginagawa ng ate niya. Isang araw na di siya pinayagang sumama sa ate niya sa party, tumakas siya at nakipag-party pa din. Napagalitan siya at naglayas. Hiniling niya sa diwata ng mahiwagang balon na magkatotoo na ang matagal na niyang minimithi. Pinagbigyan naman siya nito at nagkaroon siya ng katawan ng isang labing-walong taon, bagama't taglay pa rin niya ang kanyang walong taong isipan at kilos. Napaibig ng bagong Laila ang crush niyang si Dr. Manny (Paolo Rivero). Ano naman kaya ang patutunguhan ng ganitong relasyon?

Sa aspetong teknikal, ay pangkaraniwan lamang ang ipinakita ng pelikula. Maaaring maganda ang concept ng sumulat, ngunit hindi kagandahan ang kinalabasan. Malabo ang pagkakaugnay-ugnay ng ilang eksena, at maraming katanungan na naghahanap ng kasagutan. Mahina ang direksiyon at may kahinaan din ang mga nagsiganap.

Giglang Liko Movie

Sa kabila ng mabuting samahan at maigting na pag-iibigan nina Choleng (Barbara Milano) at Gerry (Gerald Madrid), nagpumilit si Choleng na makipagsapalaran sa Maynila kahit pa ito'y nangahulugan ng pagkakalayo nila ni Gerry. Lumipas ang buwan at taon, wala nang balita kay Choleng kung kaya't nagdesisyon si Gerry na lumuwas ng lungsod at hanapin ang kasintahan. Nakipisan siya sa kanyang kababatang si Aldo (Harold Pineda), isang macho dancer na namamasada ng taxi sa araw at nagbebenta ng aliw sa gabi. Namulat si Gerry sa hirap ng buhay sa Maynila, taliwas sa kanyang inaakalang mabuti ang pamumuhay rito, ngunit pinili pa rin niyang magbanat ng buto sa pamamagitan ng pamamasada ng taxi kaysa ibenta ang kanyang sarili na tulad ng ginagawa ng kanyang kaibigan. Ang kanyang naunang pakay na paghahanap kay Choleng ay nauwi sa liko-likong suliranin at hamon ng buhay nang minsan sa kanyang pamamasada ay magkrus ang landas nila ng misteryosang si Lerma (Halina Perez) na siyang may hawak ng susi ng tunay na kinalalagyan ni Choleng.

Karaniwan at gasgas na ang kuwento ng Biglang Liko. Karamihan sa mga eksena rito ay pawang duplikasyon na lamang ng mga naunang pelikulang may ganito ring tema ng kahirapan at prostitusyon. Matapat naman ang pelikula sa layon nitong ipakita ang madilim na kalagayan ng mga maralitang taga-lungsod bagama't biglang lumiko ang kuwento mula sa kahirapan papunta sa karahasan. Pawang kakambal na ng hirap ang marahas na pamumuhay. Sayang at naging mababaw ang pagsasalarawan ng pelikula pagdating sa aspetong ito. Mabuti na lamang at mahusay ang sinematograpiya at ang pagganap nina Gerald Madrid at Harold Pineda. Maging ang baguhang si Nina Lopez ay nagpakita ng kahusayan na di karaniwan sa isang baguhan. Hindi rin malilimutan si Anita Linda sa pelikulang ito bilang isang matandang puta na ibinubugaw ang apo. Dahil sa mga ilang kahusayang ito, di na rin nakakabagot panoorin ang Biglang Liko.