PILYA

Pilya itong si Lucy Cristobal (Trina Shields). Pumasok siya sa Sogo Hotel na nakasuot-madre, nagsigarilyo't nakipaghalikan sa katipang si Jayjay (Nixon Cruz), inakit ang titser na si Ms. Fernandez (Kristina Kasten), at tinukso si Bernard Guillermo (Joey Galvez) na halos lumabas ng seminaryo. Tanging ang kanyang maysakit na kapatid na si Grace Castro (Melissa Mendez) ang nakaaalam kung bakit siya nagkaganito. Ngunit hindi maganda ang kanilang relasyon kung kaya't pinalayas nito ang kapatid nang mabalitaan niyang nasangkot si Lucy sa isang drug raid. Tumira siya sa Sogo Hotel upang ipagpatuloy ang kanyang kapilyahan. Dito'y natuklasan niyang may "double life" si Mauro (Bobby Benitez), ang asawa ni Grace. Dito rin ang huling paanyaya ni Grace na umuwi na si Lucy upang ipagtapat ang lihim na itinago sa kanya bago siya pumanaw. Mananatili pa bang pilya si Lucy matapos niyang malaman ito?

Halatang ang pagkakapili sa pangunahing artista ay dahil lamang sa kanyang katawan; maliban dito ay wala ni anumang husay ang pagkakaganap sa istorya. Mahina ang mga dialogo nito; tagni-tagni ang mga kuha, at mabagal ang pag-usad ng kwento. Sa positibong antas, nababanaag naman ang gilas ng direktor upang makalikha ng isang kapani-paniwalang pelikula—makikitang gumaganda ang kalidad ng sinematograpiya, balanse ang mga kuha, at maganda ang pagkakailaw ng mga madidilim na lokasyon. Ang nakapagtataka ay kung paano nakunan ang labas ng mga seminaryo't malalaking simbahan, ngunit ang loob ng mga ito'y tila isang maliit na kapilya lang ang makikita.

MAPUPULANG LABI

Inanunsyo sa isang pagtitipon ang nalalapit na kasal nina Poncy de Reyna (Marcus Madrigal) at ni Lara (Candy Alison). Ngunit nang magmaneho si Poncy nang gabing yaon, nakabundol siya ng isang babaeng tumatakbo nang hubad. Agad itong dinala sa ospital ngunit nang magkamalay ay di maalala nito kung sino siya o kung ano ang nangyari sa kanya. Pinangalanan itong Jennifer (Maye Tongco) ng hospital staff at nalaman nina Poncy at Lara na positibong ginahasa siya ng mga di kilalang lalaki. Dahil sa habag ni Poncy kay Jennifer, minabuti nitong alagaan ang babae at patirahin sa kanyang resthouse sa Batangas. Doon, nabuo ang isang relasyon. Galit na galit naman itong si Lara, kumalas kay Poncy at ipinagpalit ang kaibigan nitong si Allan (Joshua Diaz). Ngunit habang lumalalim ang pagkakakilala ni Poncy kay Jennifer, nalaman ni Poncy na di maganda ang pinagdaanan ni Jennifer. Magkakabalikan pa kaya sila ni Lara?

Kahanga-hanga ang musical scoring na ginawa ni Rey Valera para sa pelikulang ito. Maganda pati ang pagkakabuo ng sound effects ng pelikula. Maliban doon ay mahina na ang lahat sa pelikula—walang maipagmamalaki sa pag-arte ang nga nagsiganap, manipis ang buong kwento at plot development, maraming hindi kapani-paniwala sa pelikula. Katulad ng karamihan ng bold films, masasabing ito'y low budget maliban marahil sa mga pamasaheng ginastos sa mga location shooting. Bagamat pasable naman ang research na ginawa upang ang technical data na kailangan sa script ay magmukhang kapani-paniwala, tulad ng mga katagang ginamit sa pulisya at ospital.