LIBERATED

Si Pauleen (Diana Zubiri) ay isang liberated woman, pati na ang kanyang mga kabarkadang sina Trixie (Francine Prieto), Frankie (Rodel Velayo) at Katrina (Tuesday Vargas). Sa kani-kanilang liberated na pananaw, naiiba ang kay Pauleen sapagkat ang kanyang pagiging liberated ay nangangahulugang walang pakundangan sa sasabihin ng ibat basta't masunod lamang ang hilig ng kanyang katawan. Walang trabaho at walang direksyon ang buhay, kung kani-kaninong lalaki siya pumapatol basta't kanya itong matipuhan. Naging malaking dagok sa kanya nang hiwalayan siya ng kanyang nobyong si Tony (Christian Vasquez) dahil nahuli siya nitong nakikipagtalik sa ibang lalaki. Niligawan ni Tony si Trixie at ang dalawa'y nagkatuluyan. Lingid sa kanilang kaalaman, labis pa rin ang pagkagusto ni Pauleen kay Tony. Kung kaya't nang nakitaan nito ng butas ang relasyon ng dalawa, siya ay nanghimasok upang guluhin ito. Saan kaya siya dadalhin ng kanyang liberated na pananaw sa buhay at relasyon?

May istorya ang Liberated, at sinikap pa nga nitong magbigay-aral, ngunit hindi naging kapani-paniwala ito gawa ng maraming mga kakulangan. Sa parting teknikal, hindi pambihira ang pelikula—sa katunayan pa nga ay kulang sa maraming aspeto, tulad ng editing, tunog, atbp. May mga eksenang panggulo lamang sa istorya ngunit pangiliti sa manonood, tulad ng "panghahagip" ng mga bakla. Hindi rin consistent ang sinematograpiya—kapag eksenang-kama, pinipilit nitong maging makasining, ngunit sa iba naman ay karaniwan lamang. Masasabing tapat ang pag-arte ng mga pangunahing tauhan, subalit hindi rin naman maikakaila na walang gasinong hinihinging kakayahan ang kanilang mga papel maliban lamang sa kakayahang maghantad ng katawan at "makipagtalik" sa harap ng kamera.

Kasiping Movie

Kapwa nasa problemadong mga relasyon sina Gilda (Halina Perez) at Romeo Rodel Velayo). Si Gilda, sa kanyang ka-live in na si Boggs (Dante Balboa) na parang walang balak na siya ay pakasalan matapos ang tatlong taon nilang pagsasama. Si Romeo naman ay buong lamig na pinakikisamahan ng asawa nitong si Rowena (Diana Zubiri). Kapwa nakatira ang dalawang pares sa isang condominium building. Nagkrus ang landas nina Boggs at Rowena at may namagitan sa dalawa. Kapwa nila ito itinago sa kani-kanilang asawa ngunit madidiskubre rin sa kalaunan ni Gilda. Nalaman din ni Romeo ang lahat at naging magkatuwang sila ni Gilda sa problema. Ang kanilang pagkakaibigan ay nauwi rin sa pagsisiping. Saan kaya sila dadalhin ng kanilang pagpapalipat-lipat at pagpapalit-palit ng kandungan?

Gasgas na ang tema at istorya ng Kasiping na mababaw na tumalakay sa problemang pakikiapid. Naging nakakabagot ang daloy ng kuwento; kungdi isiningit ang pagpapatawa ng mga batikang komedyanteng sina Giselle Sanchez at Long Mejia ay makakatulog ang manonood sa kabagalan ng napaka-predictable na kuwento. Maraming kakulangan ang pelikula pagdating sa aspetong teknikal. Mula sa malamlam at di-makatotohanang karakterisasyon ng mga pangunahing tauhan (lalo na ng mga bidang sina Diana Zubiri at Halina Perez), hanggang sa sinematograpiya at disenyong pamproduksyon. Pati ang mga diyalogo ay pawang di angkop sa karakter ng mga nagsiganap. Sa kagustuhan ng Kasiping na bigyan ng bagong bihis ang gasgas nitong tema, ang naging resulta ay isang kakatwa ng pelikula na napagiwanan na ng panahon at ebolusyon ng pelikulang Pilipino.

Bakat Movie

Mapapait ang mga alaala ng kabataan ng magkapatid na si Robert (Rodel Velayo) at Marites (Rita Avila) sa kamay ng kanilang malupit na amang si Leoncio (Tommy Abuel). Lumayo sila sa ama at ni hindi na nila ito dinalaw; abala si Marites sa kanyang negosyong ukay-ukay, at ang arkitektong si Robert naman ay humaling na humaling sa kasintahang si Leslie (Ana Capri). Nang mangailangan si Marites upang ipangtustos sa asawang mangingibang-bansa, inudyukan nito si Robert upang siputin ang ama at alamin kung ano na ang istado ng kanilang mamanahing ari-arian. Natuklasan nila dito na may kasama na si Leoncio—si Annie (Diana Zubiri), isang dalagang nawala sa sarili at napadpad lamang sa bahay ni Leoncio ay tuluyan nang kinupkop at pinakasalan nito gawa ng magkahalong pagnanasa at habag: maalindog at batang-batang si Annie subali't may kapansanan ito sa utak.

Buong-buo ang kuwento at mahusay ang pagsasalarawan ng Bakat na isinulat ng batikang si Lualhati Bautista. Makatotohanan, kapani-paniwala at magaling ang pagganap ng mga artista, pangunahin man, pumapangalawa o ekstra. Akma rin ang musika at sinematograpiya sa takbo ng kuwento. Bagama't may mga "gusot" sa editing, maituturing na ring mahusay ito sapagkat maayos ang daloy ng pelikula, walang nasasayang na eksena, o kaya'y pinahahaba pa nang higit sa hinihingi ng kuwento. Pinag-isipan din ang pagpili ng lugar at mga tanawin sa setting na lalawigan, bagay na nakadagdag sa ganda at pagkamakatotohanan ng pelikula.